Matthew 26

Upiai aweisal ti teleiai *Jises

Mk 14:1-2; Lk 22:1-2; Jn 11:45-53

1Ti Jises kak hatapoa hatesol kakaian, i hone tesol kahikahin, 2“Amuto tioi ka *Pasova, tehu angiain lalap ti laha telei *sipsip wawan uluha, i hutui muhi ngain huohu. Tataen ien laha hangaini nga hani laha telei. Laha tahi hakea nga *tel Nati Seilon hani he *kros.”

3Lokon ien teka masiwi tuah ti hukuminiai Haeu ma seilon, ma teka masiwi liai, laha apuha hani leili ingi Kaiapas, tel masiwi tapein ti hukuminiai Haeu ma seilon. 4Laha xinoti tanomi kakain, ti tap tel seilon tioi, sale pohiai Jises ma teleian. 5Tuahe laha ukek, “Kako kum aile ti leili Pasova uke teka seilon paxaiwa ape laha hutui hile wasolalaha.”

Tel hehin tihi sanda he pati Jises

Mk 14:3-9; Jn 12:1-8

6Lokon ien Jises Betani leili ingi Saimon, tel seilon kemuk hina nax lialun he tinun. 7Ti lato to angiang, tel hehin kauma tehu sanda kahun pate lalap ma poun pate solian ape i tihi hani he pati Jises.

8Ti tesol kahikahin paxaiwa, lolato lialu. Lato ukek, “Kalahai i tua tihi xoini tehu sanda? 9Pamu ewian na hangaini waxiwen moni lalap ape hani teka seilon tap soxi.”

10Tuahe Jises hone lato ukek, “Kum hohowini i nake i ailele saun solian hani nga. 11Teka seilon tap soxi laha lawe kapimuto, amuto pon hualialaha telao ti na pahamuto. Tuahe nga kumahe lawe kapimuto. 12I tihi sanda hani patuk apeseniak ti tehu tihiniak. 13Nga kakane hawane amuto, tesol tesol ti laha kaxi *meng solian ti Haeu, tin laha kaxi waliko ti tel hehin aile hahani nga lehe seilon nameni i.”

Judas pahan i hangaini Jises

Mk 14:10-11; Lk 22:3-6

14Imuh, tel ti tesol huopanim hua kahikahin axan Judas Iskariot, i nahih hani kapi teka masiwi tuah ti hukuminiai Haeu ma seilon. 15I kamei lato, “Na nga hangaini Jises hani amuto, hil moni amuto hani nga?” Ape lato hani i 30 moni silva. 16Taen ien ape Judas upia tehu taun solian na i hangaini Jises hani lato.

Apeseniai an ti Pasova

Mk 14:12-16; Lk 22:7-13

17Ngain tehu hutuiai angiain lalap ti teka *Ju ani bret tenen i tai xiu, tesol *kahikahi Jises nahih hani kapin ape kamei i, “Paham amite apeseni tehu angiain ti Pasova hani ia?”

18Jises hone lato, “Nahih haniwa Jerusalem kapi tel seilon nga kakanewen amuto ape honewa i, ‘Tel masiwi ukek ka taun tetan ti Haeu kikilami ape i xohiwen. I ma tesol kahikahin ang tehu angiain ti Pasova leili ingam.’” 19Tesol kahikahin aile usi waliko ti Jises hohone lato ape lato apeseni an ti Pasova ien.

Jises ang tehu angiain ti Pasova kapi tesol kahikahin

Mk 14:17-25; Lk 22:14-23; Jn 13:21-30; 1 Kor 11:23-26

20Ti i alohahawa, Jises ma tesol huopanim huhua kahikahin to ang apuha. 21Ti lato angiang, Jises ukek, “Nga kakane amuto, tel ti amuto hangaini nga hani mini teka laha watakai hawane nga.”

22Ti lato hongoa, tialato kawat hawane ape tel tel ti lato kamei Jises, “Kaie kumahe nga?”

23Jises kak pahoi lato ukek, “Tel na i xomi anan hani leili tehu tone an kapik, i tetel i hangaini nga. 24Nga tel Nati Seilon imuh nga mat, masin ti kakai Haeu kakawen. Tuahe kawatan lalap tunahi tel seilon i hangaini nga hani laha telei. Pamu ewian na i tai takah!”

25Judas, tel hangainian tin i kamea, “Tel masiwi, kaie kumahe o kakak nga?”

Jises pahoi i ukek, “Masin ti puki o kakawen.”

26Leilon ti lato angiang, Jises waxi bret, i kak kemulik hani Haeu ape i wiki sei hani tesol kahikahin. I ukek, “Waxi aniwa, se tupuak.”

27I waxi tehu kap waen, i kak kemulik hani Haeu ape i hani tesol kahikahin. I ukek, “Amuto hatesol unumiwa. 28Ie se kakauk i xiweu ti kolakol ka Haeu oxoxi seilon ti kawatan ti lialui woulaha na laha hana namil xoxoan hani i. Mateak kola hapoponowi ka Haeu xinoti tenen namil haun kapi seilon. 29Nga kakane hawane amuto, nga kum un ulea waen atengi tataen ti kako amuam leili *tone Haeu tel Tamak.”

30Muhin ien lato pakui tenen pak hani Haeu ape lato nahih ahuta hani Maunt Oliv.

Jises kak kilami ka Pita ase

Mk 14:27-31; Lk 22:31-34; Jn 13:36-38

31Jises hone lato, “Ti ipong tetehu amuto hatesol kiliwau salili nga, masin ti kakai Haeu kakawen, i ukek,

“‘Nga telei tel ngahatiai sipsip
ape teka sipsip kiliwau silahota!’” ^a
32Ape Jises ukek, “Tuahe muhin ti Haeu xahateni aliakewa nga ti mateak, nga nahih hani Galili imat ti amuto.”

33Pita hone Jises, “Nga kum ox salili wanen o, kalak na lato hatesol ox salili o.”

34Jises hone Pita, “Nga kakane hawane o, imat ti tok mom wawan kokoini ipong tetehu, o putini ka o kum tioi wanen nga uke he toluhu.”

35Tuahe Pita ukek, “Nga kum kak wanen ukek ien, kalak na nga mat ohoi o!” Ape hatesol kahikahin tin lato kak ukek ien.

Jises kakak kapi tel Taman Haeu he Getsemani

Mk 14:32-42; Lk 22:39-46

36Jises ma tesol kahikahin tahia hani tesol kin axan Getsemani. I hone lato, “Amuto tiliwen ie ti nga kakak kapi tel Tamak Haeu.” 37I waxi Pita ma hua nati Sebedi, Jeims ma Jon. Tian pate i kawat ape i mamata xexex. 38I kakane lato ukek, “Tiak pate kawatan, sikole i telei nga. Amuto tiliwen ie, ah akatima nga.”

39I nahih ahewa teik kokol ape i eng kalunga hani hepekeun. I kamei eliel Haeu ukek, “Tel Tamak Haeu, na i pon, xaxaweniwa kawatan ti matemate ti lehe i tunahi nga! Tuahe pahak nga usi namilom.” 40Jises nahih alia hani kapi tolu kahikahin ape i ningahi lato mamatih. I kakane Pita, “Alahan pate amuto kum ah? 41Ah kapitawa ma lotu tatalewa lehe amuto xoini totohong ti *Satan na i tunahi amuto. Pahamuto ailean tuahe tupuamuto pate kawatan.”

42Jises nahih ape i kakak ulea kapi tel Taman Haeu. I ukek, “Tel Tamak Haeu, na kumahe paham xaxaweniai kawatan ti matemate, nga usi namilom.” 43Ti i nahih aliawa, i ningahi lato mamatih ulea. Lato kum kongini uke lihiai pulalato.

44Ape he toluhu i nahih kakak kapi tel Taman. I kakak waliko tin tetenen. 45Ti i nahih alia haniwa kapi tesol kahikahin i hone lato, “Amuto matih hahanau tutuen? Hongoa! Ape i meiwen taun ti nga tel Nati Seilon, laha hani he mini teka seilon lialun. 46Xahatawa! Seilon tetel hangainiak ape i nanahima. Kako nahih pahoi i.”

Laha xoti Jises

Mk 14:43-52; Lk 22:47-53; Jn 18:1-12

47Jises kakak tutuen ti Judas tel ti tesol huopanim huhua kahikahin tahiawa. Kilan wanen seilon kakahiti i, laha akekeni ngol weluwelun ma pata ti hile. Teka masiwi tuah ti hukuminiai Haeu ma seilon, ma teka masiwi liai taloa laha. 48Judas hani peleiwen laha tenen kolakol, i ukek, “Seilon tel nga asoi taliopan se tetel ien. Amuto pohiwa!” 49Judas nahih sawi hani kapi Jises ape i ukek, “Tel masiwi, amuam ti Haeu hani o.” Ape i asoi taliope Jises.

50Jises hone i, “Tel lohuk, aile koseniwa waliko ti lehe o aile.” Laha pohi i ape akeni kongini. 51Tel ti tesol kahikahi Jises waxi tea ngol weluwelun ape i tai koti haputa taxingi tel unaui tel masiwi tapein ti hukuminiai Haeu ma seilon.

52Jises hone i, “Hana aliakewa tea ngol haniwa he ingan. Seilon teka laha hil ani ngol, laha mat alia ti ngol. 53Oheak o kum tioi ka nga pon kameiai huhual ti tel Tamak Haeu ape i pon hamosu hanima nga lawalawai teka *engel ti hile? 54Tuahe na Haeu aile ukek ien, kakain ti kakai Haeu kaxiwen i kum sohot poponowi.”

55Jises hone teka seilon, “Amuto nahih hetekiema paumuto ti hile waxiak hanowi ka nga seilon lengean. Lawe ngain nga to hahanau teka seilon leili *Ingi Haeu tuahe amuto tai pohi nga lokon ien. 56Tesol waliko ie i sohot hapoponowiai kakain ti *teka kuluiai kakai Haeu taiwen.” Lokon ien hatesol kahikahin kiliwau salili i.

Teka masiwi ti teka Ju sului Jises

Mk 14:53-65; Lk 22:54-55, 63-71; Jn 18:13-14, 19-24

57Teka seilon laha akeni kongini Jises, laha ati i hani tehu ingi Kaiapas, tel masiwi tapein ti hukuminiai Haeu ma seilon. *Teka hanaui nauna ti Moses ma teka masiwi liai hoi laha apupuha ien. 58Pita nahih otioti Jises tamus hani mate ingi Kaiapas. I to akati tesol peteniai Ingi Haeu. Pahan i paxai waliko tenen na i sohot hani Jises.

59Kaiapas ma teka masiwi liai ti teka Ju, laha upiup teka seilon na laha aile kakain puputa ti suluiai Jises lehe waxi laha telei. 60Kilan seilon laha nahima tuahe kakaialaha i kum pon suluiai Jises. Tapeinan hua seilon nahima ape lalu ukek, 61“Tel seilon ie ukek ka i pon toi hamananai tehu Ingi Haeu ape hatuhi aliakean leili ngain toluhu.”

62Kaiapas tua ape i hone Jises, “Huhua seilon ie susului o. Hina kakaiam?” 63Tuahe Jises tai wix pahoi.

Ape Kaiapas hone ulei i ukek, “O tuohawa ti puli Haeu na masin o *Krais tel Nati Haeu.”

64Jises kakane i, “Masin ti o kakawen. Nga kaxi hani amuto hatesol, imuh amuto ningahi nga tel Nati Seilon toto he tepaun min manau ti Haeu tel pohen wanen, neiniai seilon kapin ma ti nga luainima he maun.”

65Ti Kaiapas hongoa, i leng lexi tehu puxuaun ape i ukek, “Kako kum ngah ulea seilon suluian. Amuto hongoen i ukek i tel Nati Haeu. 66Amuto namiloi kako aile ukek ia?”

Laha pahoi ukek, “I aile hawane kakain lialun. I kak hahataehu Haeu. Pon hawane telei i.”

67Ape laha pukeini kawan ma xai i. Teka uke maia talini puxui pulan, teka laha tapahi i ape ukek, 68“Na o Krais, tilawa aita tel tapahi o!”

Pita ukek i kum tioi Jises

Mk 14:66-72; Lk 22:54-62; Jn 18:15-18, 25-27

69Pita toto tutuen mate ingi Kaiapas ti tel hehin unaui Kaiapas nahima ape i ukek, “O tin tel kapi Jises ti Galili!”

70Tuahe Pita ase he matalato hatesol, i ukek, “Nga kum tioi waliko tenen o kakak.”

71Ape i nahih hani onote aweing ti melal. Tel hehin liai unaui Kaiapas ningahi i ape hone teka seilon ien, i ukek, “Tel seilon ie i tin kapi Jises ti Nasaret.”

72Pita ase ulea, i ukek, “Kuinake, nga kum tioi wanen tel seilon ien.”

73Tai kue, teka seilon laha tutu ien nahih hani kapi Pita ape laha ukek, “Salan wanen o tel ti lato, kinaxom kaxi ka o ti Galili.”

74Ape Pita ukek, “Nga tuoha hawane. Na nga puputa, Haeu axi nga kawatan. Nga kum tioi wanen tel seilon ien!” Tataen ien wanen tok mom wawan kokoini.

75Ape Pita nameni kakai Jises ti i ukek, “Imat ti mom wawan kokoini, o putini ka o kum tioi wanen nga uke he toluhu.” Pita nahih salili laha ape i tang tahane hawane.